Aug
2016
義工感想(1)

"Sunny 今晚去邊到玩呀?"


"今晚去收菜嘛"


"又去收?都唔明你諗咩?街市又污糟又熱又焗!每個星期都係做同一樣野,你唔悶架?"

 

近依半年好多朋友都問過相類似問題,每次我都會諗點解自己會keep住參加?地點都幾唔方便架,我住新界但係服務地點係深水埗,一來一回都用了近兩小時。而依個活動少一分體力都唔得架,因為搬菜推車真係唔易架,次次番到屋企成個人都散架。但係中心職員,義工朋友,街市菜販,計劃受惠者以及一眾麗閣街坊都好nice。雖然大家唔係同一個年齡層,但係都會有傾有講,例如係同家人嘅生活、子女嘅管教、物價升幅、如何養生保健,甚至係對社區發展、政治環境嘅睇法!

 

好惜食計劃除左減少食材嘅浪費,更提供機會有能力嘅人協助其他人去改善他們的生活,同時最重要嘅係提供一個平台讓大家去交流!作為年青人,聽下老街坊嘅威水史,街市商戶每日拼博十幾個鐘嘅辛酸史,其他義工朋友嘅生活趣事,大大擴闊我哋嘅視野。與此同時,我從負責社工及其他朋友身上學到唔少營運依果計劃嘅知識,例如係點樣同街坊鄰里打好關係、派菜時嘅人流控制、如何加強唔同持分者對計劃嘅認識等。

 

暫時講到依度,之後有機會嘅你哋嚟參加再同分享下其他開心野。

 

Sunny Wong(黃姑娘)